ᐃᓄᐃᑦ ᐅᖃᐅᓯᖓᓐᓂᒃ ᓴᖅᑭᔮᖅᑎᑦᑎᓂᕐᒧᑦ ᐃᓕᓴᕆᔭᐅᔾᔪᑦ
ᐱᒻᒪᕆᐅᖃᑕᐅᔪᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᑦ ᐱᓕᕆᐊᕆᔭᖏᓐᓂ ᐃᓕᓴᕆᔭᐅᔾᔪᓯᐊᖅᑎᑦᑎᖃᑦᑕᕐᓂᖅ ᑲᑐᔾᔨᖃᑎᒌᖑᑦ, ᐱᓕᕆᐊᖃᖃᑎᒌᖑᔪᑦ ᐃᓄᐃᓪᓘᓐᓃᑦ ᐃᑲᔪᖅᓯᒪᓂᖃᖅᑐᑦ ᐃᓄᐃᑦ ᐅᖃᐅᓯᖓᑦᑕ ᐱᕙᓪᓕᐊᓂᖓᓄᑦ, ᓴᖅᑭᔮᖅᑎᑕᐅᓇᓱᐊᕐᓂᖓᓄᑦ ᐸᐸᑕᐅᓇᓱᐊᕐᓂᖓᓄᓪᓗ.
ᑕᐃᒎᓯᓕᐅᖅᑎᒃᑯᑦ ᐃᒃᓯᕙᐅᑕᖓ ᓂᕈᐊᖅᑕᐅᔪᓂᒃ ᑐᓂᓯᔨᐅᖃᑦᑕᖅᑐᖅ, ᐅᓪᓗᖓ ᐋᕿᒃᑕᐅᕙᒃᑐᖅ ᑲᑎᒪᔨᓄᑦ.
ᖃᕆᓴᐅᔭᒃᑯᑦ ᐅᑯᐊ ᐱᓗᒋᑦ (ᓂᕈᐊᒐᒃᓴᓕᐅᕈᑦ - Inuktitut and English)
ᓂᕈᐊᒐᒃᓴᙳᖅᑎᑕᐅᓂᐊᕐᓗᓂ ᒪᓕᒃᑕᐅᔭᕆᐊᓖᑦ
ᓂᕈᐊᒐᒃᓴᙳᖅᑎᑕᐅᔪᓐᓇᖅᑐᑦ ᐅᑯᓂᖓ ᒪᓕᒃᑯᑎᒃ:
- ᓄᓇᕗᒻᒥᐅᑕᐅᓗᓂ
- ᓄᓇᕗᑦ ᒐᕙᒪᖓᑦᑕ ᐱᓕᕆᕝᕕᖏᑦ ᑎᒥᖁᑎᖏᓪᓘᓐᓃᑦ
- ᕼᐊᒻᒪᓚᐃᑦ
- ᓇᖕᒥᓂᖃᖅᑎᑦ
- ᑮᓇᐅᔭᓕᐅᕋᓱᐊᙱᑦᑐᑦ ᑲᑐᔾᔨᖃᑎᒌᑦ, ᐃᑲᔪᖅᐸᒃᑐᓪᓗ ᑮᓇᐅᔭᖅᑎᒍᑦ
- ᐃᓄᐃᑦ ᐊᒻᒪ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᑦ
- ᐃᓕᓐᓂᐊᕐᕖᑦ ᐃᓕᓐᓂᐊᖅᑐᓕᕆᔨᒃᑯᓪᓗ ᑲᑎᒪᔨᖏᑦ
- ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᖏᑦ
- ᐃᓅᓯᕐᒥᓂ ᐅᖃᐅᓯᓕᕆᓂᕐᒧᑦ ᐱᓕᕆᐊᖃᖃᑦᑕᖅᓯᒪᔪᑦ ᐃᓅᔪᓐᓃᖅᓯᒪᔪᑦ
- ᐊᓯᖏᑦ ᓂᕈᐊᒐᒃᓴᑦ ᐊᖏᕈᑕᐅᓯᒪᔪᑦ ᑲᑎᒪᔨᓄᑦ
ᓂᕈᐊᒐᒃᓴᙳᖅᑎᑕᐅᔪᓐᓇᖅᑐᑦ ᐱᓕᕆᐊᕆᓯᒪᔭᖏᑦ ᐃᒪᐃᑦᑑᔪᓐᓇᖅᑐᑦ:
- ᐱᓕᕆᐊᑦ ᐃᓄᒃᑑᕐᓂᕐᒥᒃ ᐊᑐᓕᕈᓐᓇᖅᓯᑦᑎᑦᑎᔾᔪᑕᐅᔪᑦ ᐊᑐᖅᑕᐅᕙᓚᐅᖅᑎᓐᓇᒍ;
- ᐱᓕᕆᐊᑦ ᐃᓐᓇᕐᓄᑦ ᒪᒃᑯᒃᑐᓄᓪᓗ ᐱᔪᓐᓇᖅᓯᕚᓪᓕᕈᑕᐅᔪᑦ ᐅᖃᓪᓚᖕᓂᕐᒥᒃ, ᐅᖃᓕᒫᕐᓂᕐᒥᒃ ᑎᑎᕋᕐᓂᕐᒥᒡᓘᓐᓃᑦ ᐃᓄᐃᑦ ᐅᖃᐅᓯᖓᒍᑦ;
- ᓴᖅᑭᑦᑎᓂᖅ ᓄᑖᓂᒃ ᐅᖃᓕᒫᒐᓂᒃ, ᑕᕐᕆᔮᒃᓴᓂᒃ ᐊᓯᖏᓐᓂᒡᓘᓐᓃᑦ ᑐᓴᐅᒪᑎᑦᑎᔾᔪᑎᓂᒃ ᐃᓄᒃᑐᑦ;
- ᐱᓕᕆᐊᑦ ᐃᓄᒃᑐᑦ ᐊᑐᓕᖅᑕᐅᕚᓪᓕᕈᑕᐅᔪᑦ ᐃᖅᑲᓇᐃᔭᕐᕕᖕᓂ;
- ᐱᓕᕆᐊᑦ ᐃᓄᒃᑐᑦ ᐱᔨᑦᑎᕋᕈᑕᐅᔪᓄᑦ ᐊᑐᓕᖅᐹᓪᓕᕈᑕᐅᔪᑦ.
ᓂᕈᐊᒐᒃᓴᑦ ᐃᓱᒪᒋᔭᐅᖃᑦᑕᕐᓂᐊᖅᐳᑦ ᐅᑯᐊ ᒪᓕᒃᑕᐅᓗᑎᒃ:
- ᐊᒃᑐᐃᓯᒪᓂᖓ ᐃᓄᒃᑐᑦ ᑐᓴᐅᒪᖃᑎᒌᒍᓐᓇᕈᑎᖏᑎᒍᑦ.
- ᓄᓇᓖᑦ ᐊᒃᑐᖅᑕᐅᓯᒪᓂᖃᕐᓂᖏᑕ ᐊᒥᓲᓂᖏᑦ ᐱᓕᕆᐊᕆᔭᐅᔪᓄᑦ ᐊᓯᔾᔨᖅᑕᐅᔪᓄᓪᓗ.
- ᐃᓄᒃᑐᑦ ᐅᖃᐅᓯᕐᒥᒃ ᓴᖅᑭᔮᖅᑎᑦᑎᑦᑎᐊᕋᓱᐊᕐᓂᖓ ᐃᓱᒪᒐᔾᔫᓂᒃᑯᑦ.
ᐃᓄᑐᐃᓐᓇᐃᑦ ᑲᑐᔾᔨᖃᑎᒌᖑᔪᓪᓘᓐᓃᑦ ᓂᕈᐊᒐᒃᓴᙳᖅᑎᑦᑎᔪᓐᓇᖅᑐᑦ ᓂᕈᐊᒐᒃᓴᐅᔪᒥᒋᔭᕐᒥᓂᒃ. ᐊᑕᐅᓯᑐᐊᕐᒥᒃ ᓂᕈᐊᒐᒃᓴᙳᖅᑎᑦᑎᔭᕆᐊᖃᖅᐳᑎᑦ, ᓄᓇᓖᑦ ᐊᕕᒃᑐᖅᓯᒪᔪᖏᓐᓂᙶᖅᑐᒥᒃ, ᐃᓕᓐᓂᐊᕐᕕᖕᓂᑦ ᓄᓇᕗᒻᒥᐅᑕᕐᓂᒡᓘᓐᓃᑦ.