ᐃᓕᓴᕆᔭᐅᔾᔪᓯᐊᕈᓯᐅᑉ ᒥᒃᓵᓄᑦ

ᐃᓄᐃᑦ ᐅᖃᐅᓯᖓᓂᒃ  ᓴᖅᑭᔮᖅᑎᑦᑎᓂᕐᒧᑦ  ᐃᓕᓴᕆᔭᐅᔾᔪᑦ

ᐱᒻᒪᕆᐅᖃᑕᐅᔪᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᑦ ᐱᓕᕆᐊᕆᔭᖏᓐᓂ ᐃᓕᓴᕆᔭᐅᔾᔪᓯᐊᖅᑎᑦᑎᖃᑦᑕᕐᓂᖅ ᑲᑐᔾᔨᖃᑎᒌᓄᑦ, ᐱᓕᕆᐊᖃᖃᑎᒌᖑᔪᑦ ᐃᓄᐃᓪᓘᓐᓃᑦ ᐃᑲᔪᖅᓯᒪᓂᖃᖅᑐᑦ ᐃᓄᐃᑦ ᐅᖃᐅᓯᖓᑦᑕ ᐱᕙᓪᓕᐊᓂᖓᓄᑦ, ᓴᖅᑭᔮᖅᑎᑕᐅᓇᓱᐊᕐᓂᖓᓄᑦ ᐸᐸᑕᐅᓇᓱᐊᕐᓂᖓᓄᓪᓗ.

ᑕᐃᒎᓯᓕᐅᖅᑎᒃᑯᑦ ᐃᒃᓯᕙᐅᑕᖓ ᓂᕈᐊᖅᑕᐅᔪᓂᒃ ᑐᓂᓯᔨᐅᖃᑦᑕᖅᑐᖅ, ᐅᓪᓗᖓ ᐋᕿᒃᑕᐅᕙᒃᑐᖅ ᑲᑎᒪᔨᓄᑦ

ᓂᕈᐊᒐᒃᓴᙳᖅᑎᑕᐅᓂᐊᕐᓗᓂ ᒪᓕᒃᑕᐅᔭᕆᐊᓖᑦ

ᓂᕈᐊᒐᒃᓴᙳᖅᑎᑕᐅᔪᓐᓇᖅᑐᑦ ᐅᑯᓂᖓ ᒪᓕᒃᑯᑎᒃ:

  • ᓄᓇᕗᒻᒥᐅᑕᐅᓗᓂ
  • ᓄᓇᕗᑦ ᒐᕙᒪᖓᑦᑕ ᐱᓕᕆᕝᕕᖏᑦ ᑎᒥᖁᑎᖏᓪᓘᓐᓃᑦ
  • ᕼᐊᒻᒪᓚᐃᑦ
  • ᓇᖕᒥᓂᖃᖅᑎᐅᔪᑦ
  • ᑮᓇᐅᔭᓕᐅᕋᓱᐊᙱᑦᑐᑦ ᑲᑐᔾᔨᖃᑎᒌᑦ, ᐃᑲᔪᖅᐸᒃᑐᓪᓗ ᑮᓇᐅᔭᖅᑎᒍᑦ
  • ᐃᓄᐃᑦ ᐊᒻᒪ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᑦ
  • ᐃᓕᓐᓂᐊᕐᕖᑦ ᐃᓕᓐᓂᐊᖅᑐᓕᕆᔨᒃᑯᓪᓗ ᑲᑎᒪᔨᖏᑦ
  • ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᖏᑦ
  • ᐃᓅᓯᕐᒥᓂ ᐅᖃᐅᓯᓕᕆᓂᕐᒧᑦ ᐱᓕᕆᐊᖃᖃᑦᑕᖅᓯᒪᔪᑦ ᐃᓅᔪᓐᓃᖅᓯᒪᔪᑦ
  • ᐊᓯᖏᑦ ᓂᕈᐊᒐᒃᓴᑦ ᐊᖏᕈᑕᐅᓯᒪᔪᑦ ᑲᑎᒪᔨᓄᑦ

ᓂᕈᐊᒐᒃᓴᙳᖅᑎᑕᐅᔪᓐᓇᖅᑐᑦ ᐱᓕᕆᐊᕆᓯᒪᔭᖏᑦ ᐃᒪᐃᑦᑑᔪᓐᓇᖅᑐᑦ:

  • ᐱᓕᕆᐊᑦ ᐃᓄᒃᑑᕐᓂᕐᒥᒃ ᐊᑐᓕᕈᓐᓇᖅᓯᑦᑎᑦᑎᔾᔪᑕᐅᔪᑦ ᐊᑐᖅᑕᐅᕙᓚᐅᖅᑎᓐᓇᒍ;
  • ᐱᓕᕆᐊᑦ ᐃᓐᓇᕐᓄᑦ ᒪᒃᑯᒃᑐᓄᓪᓗ ᐱᔪᓐᓇᖅᓯᕚᓪᓕᕈᑕᐅᔪᑦ ᐅᖃᓪᓚᖕᓂᕐᒥᒃ, ᐅᖃᓕᒫᕐᓂᕐᒥᒃ ᑎᑎᕋᕐᓂᕐᒥᒡᓘᓐᓃᑦ ᐃᓄᐃᑦ ᐅᖃᐅᓯᖓᒍᑦ;
  • ᓴᖅᑭᑦᑎᓂᖅ ᓄᑖᓂᒃ ᐅᖃᓕᒫᒐᓂᒃ, ᑕᕐᕆᔮᒃᓴᓂᒃ ᐊᓯᖏᓐᓂᒡᓘᓐᓃᑦ ᑐᓴᐅᒪᑎᑦᑎᔾᔪᑎᓂᒃ ᐃᓄᒃᑐᑦ;
  • ᐱᓕᕆᐊᑦ ᐃᓄᒃᑐᑦ ᐊᑐᓕᖅᑕᐅᕚᓪᓕᕈᑕᐅᔪᑦ ᐃᖅᑲᓇᐃᔭᕐᕕᖕᓂ;
  • ᐱᓕᕆᐊᑦ ᐃᓄᒃᑐᑦ ᐱᔨᑦᑎᕋᕈᑕᐅᔪᓄᑦ ᐊᑐᓕᖅᐹᓪᓕᕈᑕᐅᔪᑦ.

ᓂᕈᐊᒐᒃᓴᑦ ᐃᓱᒪᒋᔭᐅᖃᑦᑕᕐᓂᐊᖅᐳᑦ ᐅᑯᐊ ᒪᓕᒃᑕᐅᓗᑎᒃ:

  1. ᐊᒃᑐᐃᓯᒪᓂᖓ ᐃᓄᒃᑐᑦ ᑐᓴᐅᒪᖃᑎᒌᒍᓐᓇᕈᑎᖏᑎᒍᑦ.
  2. ᓄᓇᓖᑦ ᐊᒃᑐᖅᑕᐅᓯᒪᓂᖃᕐᓂᖏᑕ ᐊᒥᓲᓂᖏᑦ ᐱᓕᕆᐊᕆᔭᐅᔪᓄᑦ ᐊᓯᔾᔨᖅᑕᐅᔪᓄᓪᓗ.
  3. ᐃᓄᒃᑐᑦ ᐅᖃᐅᓯᕐᒥᒃ ᓴᖅᑭᔮᖅᑎᑦᑎᑦᑎᐊᕋᓱᐊᕐᓂᖓ ᐃᓱᒪᒐᔾᔫᓂᒃᑯᑦ.

ᐃᓄᑐᐃᓐᓇᐃᑦ ᑲᑐᔾᔨᖃᑎᒌᖑᔪᓪᓘᓐᓃᑦ ᓂᕈᐊᒐᒃᓴᙳᖅᑎᑦᑎᔪᓐᓇᖅᑐᑦ ᓂᕈᐊᒐᒃᓴᐅᔪᒥᒋᔭᕐᒥᓂᒃ. ᐊᑕᐅᓯᑐᐊᕐᒥᒃ ᓂᕈᐊᒐᒃᓴᙳᖅᑎᑦᑎᔭᕆᐊᖃᖅᐳᑎᑦ, ᓄᓇᓖᑦ ᐊᕕᒃᑐᖅᓯᒪᔪᖏᓐᓂᙶᖅᑐᒥᒃ, ᐃᓕᓐᓂᐊᕐᕕᖕᓂᑦ ᓄᓇᕗᒻᒥᐅᑕᕐᓂᒡᓘᓐᓃᑦ.