ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᐅᖃᐅᓯᓕᕆᓂᕐᒧᑦ ᓯᕗᒃᑲᖅᑕᖅᑎᐅᕗᑦ, ᓴᖅᑭᑕᐅᓚᐅᖅᑐᖅ ᒪᓕᒐᓕᐅᕐᕕᒻᒥᑦ ᓄᓇᕗᒻᒥ. ᑎᑎᕋᖅᐸᓪᓕᐊᔭᕆᐊᖃᖅᐳᑦ ᐊᑐᐃᓐᓇᐅᑎᑦᑎᓗᑎᒡᓗ ᐃᓄᐃᑦ ᐅᖃᐅᓯᖓᓐᓄᑦ ᐱᓕᕆᐊᖑᔪᓂᒃ ᐃᓱᒪᓕᐅᖅᐸᒡᓗᑎᒡᓗ ᐅᖃᐅᓯᓕᕆᓂᕐᒧᑦ ᓄᓇᕗᒻᒥᐅᓕᒫᓄᑦ ᐊᑐᖅᑕᐅᕙᖕᓂᐊᖅᑐᓂᒃ. ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᐱᔪᓐᓇᐅᑎᒋᔭᖏᑦ ᓇᓗᓇᐃᖅᑕᐅᓯᒪᕗᑦ ᐃᓄᐃᑦ ᐅᖃᐅᓯᖏᓐᓂᒃ ᓴᐳᒻᒥᔭᐅᓂᖓᓄᑦ ᐱᖁᔭᕐᒥ (2008).
ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ ᓴᖅᑭᐅᒪᑎᑦᑎᕗᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᓄᑦ ᐊᒥᓱᓂᒃ ᐱᔪᓐᓇᐅᑎᖃᖅᑎᑦᑎᕗᖅ ᐱᓕᕆᐊᒃᓴᒥᓂᒃ ᐱᓕᕆᐊᖃᑦᑎᐊᕈᓐᓇᖁᓪᓗᒋᑦ.
ᐅᑯᐊ ᑕᕝᕙ ᐱᓕᕆᐊᒃᓴᐅᔪᑦ ᓇᐃᓈᖅᓯᒪᔪᑦ:
ᖃᐅᔨᒪᓂᖅ
- ᖃᐅᔨᒪᕚᓪᓕᖅᑎᑦᑎᓂᖅᓴᐅᓕᕐᓗᑎᒃ ᐊᒻᒪᓗ ᐊᔪᕈᓐᓃᖅᑎᑦᑎᒃᑲᓐᓂᒻᒪᕆᒡᓗᑎᒃ ᐃᓄᐃᑦ ᐅᖃᐅᓯᖓᒍᑦ.
- ᐃᑲᔪᖅᑐᐃᓗᑎᒃ ᖃᐅᔨᓴᕐᓂᕐᒥᒃ ᑎᑎᕋᖅᑕᐅᓗᑎᒃ ᐊᒻᒪᓗ ᐸᐸᑕᐅᓗᑎᒃ ᐱᖅᑯᓯᑐᖃᖅᑎᒍᑦ ᑕᐃᒎᓯᑐᖃᐃᑦ, ᐅᖃᓪᓚᐅᓰᑦ ᐊᔾᔨᒌᙱᑦᑐᑦ, ᐅᖃᕈᓰᑦ ᐊᒻᒪᓗ ᐊᑐᖅᑕᐅᖃᑦᑕᖅᓯᒪᔪᑦ ᐃᓄᐃᑦ ᐅᖃᐅᓯᖓᒍᑦ.
ᓴᖅᑭᐅᒪᑎᑦᑎᓗᑎᒃ ᓴᐳᒻᒥᓗᑎᒡᓗ ᐃᓄᐃᑦ ᐅᖃᐅᓯᖓᓂᒃ
- ᐃᓱᒪᓕᐅᑦᑎᐊᕋᓱᒡᓗᑎᒃ ᐃᓱᒪᓕᐅᖅᐸᒡᓗᑎᒡᓗ ᐃᓄᐃᑦ ᐅᖃᐅᓯᖓᑦᑕ ᐊᑐᖅᑕᐅᕙᖕᓂᖓ, ᐱᕙᓪᓕᐊᓂᖓ ᑕᒪᐃᓐᓄᓪᓗ ᐊᑐᖅᑕᐅᔪᒃᓴᓕᐊᖑᓂᖓ.
- ᓴᖅᑭᑦᑎᓗᑎᒃ ᐊᐅᓚᑦᑎᓗᑎᒡᓗ ᐃᓕᓴᕆᔭᐅᔾᔪᓯᐊᕈᑎᓂᒃ, ᐃᓕᓴᖅᓯᖃᑦᑕᕐᓂᐊᕐᓗᑎᒃ ᑲᑐᔾᔨᖃᑎᒌᖑᔪᓂᒃ ᐃᓄᖕᓂᒡᓘᓐᓃᑦ ᐱᓕᕆᐊᖃᑦᑎᐊᕋᓱᐊᖅᑐᓂᒃ ᐊᑐᓕᖅᑎᑦᑎᓇᓱᐊᖅᑐᓂᒡᓗ ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᔭᐅᓂᖓᓄᑦ ᐱᖁᔭᕐᒦᑦᑐᓂᒃ, ᐃᑲᔪᖅᓱᐃᓯᒪᔪᓂᒡᓘᓐᓃᑦ, ᓴᖅᑭᔮᖅᑎᑦᑎᓇᓱᒃᑐᓂᒃ ᓴᐳᒻᒥᒃᖠᓇᓱᒃᑐᓂᒡᓗ ᐃᓄᐃᑦ ᐅᖃᐅᓯᖓᓐᓂᒃ.
ᑕᐃᒎᓯᓕᕆᕙᓪᓕᐊᓂᖅ ᑕᒪᐃᓐᓄᓪᓗ ᐊᑐᖅᑕᐅᔪᒃᓴᓕᐅᕐᓂᖅ
- ᐋᖅᑭᒃᓯᕙᒡᓗᑎᒃ ᑕᒪᐃᓐᓄᑦ ᐊᑐᖅᑕᐅᔪᒃᓴᓂᒃ ᐅᖃᐅᓯᕐᓂᒃ ᐅᖃᕈᓯᕐᓂᒡᓗ, ᐃᓱᒪᒃᓴᖅᓯᐅᕈᑎᖃᖅᐸᒡᓗᑎᒃ ᐅᖃᐅᓯᑐᖃᕐᓂᒃ, ᐅᖃᓪᓚᐅᓯᕐᓂᒃ ᐊᔾᔨᒌᙱᑦᑐᓂᒃ ᐊᒻᒪ ᓄᑕᐅᓂᖅᓴᓂᒃ ᓴᖅᑭᑕᐅᕙᓪᓕᐊᔭᕆᐊᖃᖅᑐᓂᒃ.
ᐃᓄᐃᑦ ᐅᖃᐅᓯᖓᑦ ᓴᐳᒻᒥᔭᐅᓂᖓᓄᑦ ᐱᖁᔭᖅ ᓴᖅᑭᑦᑎᓯᒪᕗᖅ ᑕᐃᒎᓯᓕᐅᖅᑎᒃᑯᓐᓂᒃ ᐃᒻᒥᒃᑰᖓᓂᐊᖅᑐᓂᒃ ᐃᓄᓕᒫᓄᑦ ᐱᔨᑦᑎᕋᖅᑎᐅᓗᑎᒃ. ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᑦ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓂᒃ ᑐᓂᓯᖃᑦᑕᕆᐊᖃᖅᐳᑦ ᓄᓇᕗᒻᒥ ᐅᖃᐅᓯᕐᓄᑦ ᒥᓂᔅᑕᒧᑦ ᐊᒻᒪᓗ ᒪᓕᒐᓕᐅᖅᑎᓄᑦ ᒪᓕᒐᓕᐅᕐᕕᖕᒥ.
Legislation
ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ
ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ ᓄᓇᕗᒻᒥ ᐱᖁᔭᕐᓂᒃ ᐱᒻᒪᕆᐅᓂᖅᐸᐅᖃᑕᐅᕗᖅ, ᐋᖅᑭᒃᓯᓯᒪᖕᒪᑦ ᐃᓄᒃᑐᑦ ᐅᖃᓪᓚᒃᐸᒃᑐᑦ ᐱᔪᓐᓇᐅᑎᖏᓐᓂᒃ ᐱᓕᕆᐊᖑᔭᕆᐊᖃᖅᑐᓂᒡᓗ ᒐᕙᒪᒃᑯᑦ ᐱᓕᕆᕝᕕᖏᓐᓂ ᐃᖅᑲᓇᐃᔭᖅᑎᓄᓪᓗ ᐱᔪᓐᓇᐅᑎᒋᔭᐅᔪᓪᓗ ᒪᓕᒃᑕᐅᑦᑎᐊᕋᓗᐊᕐᒪᖔᑕ ᓇᐅᑦᑎᖅᓱᕈᑕᐅᓪᓗᓂ.
ᐱᖁᔭᖅ ᓇᓗᓇᐃᖅᓯᓯᒪᑦᑎᐊᖅᐳᖅ ᐃᓄᒃᑐᑦ ᐅᖃᐅᓯᖅ ᓯᕗᓂᒃᓴᑦᑎᓐᓂ ᐱᕙᓪᓕᐊᑦᑎᐊᖏᓐᓇᕆᐊᖃᕐᓂᖓᓂᒃ ᓄᓇᕗᑦ ᒐᕙᒪᓐᓂ, ᐃᓕᓐᓂᐊᕐᓂᕐᒧᑦ ᐊᒻᒪ ᐱᔨᑦᑎᕋᕈᑕᐅᔪᓄᑦ, ᐱᖃᓯᐅᓪᓗᒋᑦ ᓇᖕᒥᓂᖃᖅᑐᓄᑦ ᐃᓄᓕᒫᓄᑦ ᐱᔨᑦᑎᖅᐸᒃᑐᓄᑦ.
ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ
http://www.gov.nu.ca/iu/node/23457
ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᐱᖁᔭᖅ
ᐃᓚᑲᓐᓂᕆᒻᒥᔭᖓ ᐆᒪ ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᔭᐅᓂᖓᓄᑦ ᐱᖁᔭᑉ, ᑖᓐᓇ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᐱᖁᔭᖅ ᒪᓕᒐᖃᕆᕗᖅ ᐊᓯᖏᓐᓂᒃ ᐱᔭᒃᓴᕆᔭᐅᔭᕆᐊᓕᖕᓂᒃ ᐊᒻᒪᓗ ᐱᓕᕆᐊᕆᔭᕆᐊᖃᖅᑐᓂᒃ ᓄᓇᕗᑦ ᒐᕙᒪᖓᓐᓄᑦ ᓴᖅᑭᔮᖅᑎᑕᐅᒋᐊᒃᑲᓐᓂᕐᓂᕐᐊᕐᓗᓂ ᐱᕚᓪᓕᖅᑎᑕᐅᒋᐊᒃᑲᓐᓂᕐᓂᐊᕐᓗᓂᓗ ᐃᓄᐃᑦ ᐅᖃᐅᓯᖓ.